《工字鐵扑中頭潮文》為潮文之一,於2011年12月23日由高登會員 宮崎美穗 (會員編號:258072) 所原創的潮文

潮文內容


是咁的,我今日一朝早就同朋友入左西貢食野
食到晏晝十二點度唔想食
於是決定出番九龍
去巴士站途中,我地行過一條街
忽然間好大條工字鐵係高處跌左落黎
唔知係咪樓上D人高空擲物
我走唔切,舊鐵一野鏗左落我個頭
仲有少少插左落我個頭度
我見D血係咁流,怕去醫院會嚇親人
但係番屋企貼膠布又怕嚇親屋企人
所以決定同朋友去旺角食糖水
睇下D糖分可唔可以上腦整乾D血


由西貢搭車出去旺角個途中,D人一路用奇異目光望住我
仲有D怯意,都唔知佢地做乜撚野
入到去間糖水鋪,果個老闆娘又係露出個好驚既表情
只係敢細細聲問我
「想食乜野...咁」
我細細聲講左句
「紅豆沙」
佢收到我ORDER之後
就急急腳衝番入廚房
連我個FD食乜都無理到
搞到佢都屌左一聲
我都好火滾,講左句「屌你老母」
就頭也不回咁離開左間糖水鋪
隱約間我仲聽到背後傳來一絲既嘆氣聲
似是鬆一口氣
我心諗,有乜咁驚
要擺個一天都光晒既撚款出黎


而怒氣沖沖既我地,之後去到某間K房
準備大唱K歌一消鬱結之火
點知一入去,個細路妹即刻O晒咀
仲叫左個經理出黎
個經理見到我之後,竟然叫左出黎
標晒冷汗咁撚樣喎,之後仲趕左我地出去
我個FD問我
「點解呢個社會既人都好似睇我地唔起咁架?」
見到個FD咁,我不禁諗
「係囉,點會咁樣架」
但我始終相信天無絕人之路
我決定帶我朋友去食壽司
去食一間真係日本人開既壽司店
我諗日本人應該好有禮貌既
唔會再咁樣諗我地


果然,入到鋪頭
個日本老闆好熱情咁招呼我地
雖然佢頭咠咠,唔知想避D乜
不過算啦,我同個FD終於可以有個地方坐定定
唉,但係佢間鋪D客質素就參差左D
食到一半,竟然有個阿叔話d wasabi難食
仲滑潺潺咁喎
講完之後就暈左係我隔離
我真係唔明
究竟依家d人識唔識得尊重食物
日本老闆講過佢鋪頭用既wasabi
可以話係數一數二
特點係有質感
所以又何來滑潺潺
呢個阿叔分明係某某大壽司鋪既打手
我安慰完老闆之後,再食多一陣
就埋單走人


走左之後,我個身熱熱地
忽然諗番,點解我好地去左西貢,依家又會入左旺角
但我已經記唔起個原因
我只想行入商場,舒服一下
踏入商場之後,我仲係好沉重
只係聽到後面個清潔阿嬸
大大聲咁話
「邊個仆街係度滴紅油呀,又搞到地下成灘鼻涕」
到呢個時候,我終於記番起
自己因乜事要入旺角...

外部連結

除非另有註明,否則社區內容均使用CC-BY-SA授權條款。