FANDOM


得四五千如何投資好?》潮文源自高登討論區同名帖子的回應,有人認為是《五毛潮文》的續篇,但兩者無明顯的關係。文中提及香港人如何計劃運用四千元到強國當上中國共產黨領導人。[1]不過中共自1982年取消黨主席,改以總書記為最高領導職務,而國家主席也只不過是虛職,因此內容並不準確。另外,全國人民代表大會名義上為最高國家權力機關,做人大代表並非一定為共產黨員。

此文在不少討論區有關投資的貼文中,都可看到其蹤跡,但在其他討論區會有不少真心回應。[2]

原文

原文由高登討論區會員「張耀揚」(高登會員編號:129306)於2010年所創。

講真,四五千話多唔多話少唔少,我建議你上大陸搞生意,香港已經冇咩發展空間喇。你先去買兩張廣州直通車飛,就400蚊,再去信和買1000蚊咸碟,同佢講大量買打個折,應該買到50隻以上,要買鬼妹同日本妹的,唔好買其他,理由下面再講。

坐到上廣州你手上仲有100蚊,去買包雲煙5蚊,然後係車站旁邊睇下邊個蛇頭鼠眼,打個眼色比佢佢就知你想唱假人仔,90蚊唱500蚊番黎,同佢講要唱散唔要100蚊紙。唱完拎包煙出黎問佢食唔食,佢見你幫襯佢就有計傾,你打蛇隨棍上問下邊到賣咸碟好。

將淨低果5蚊打散,用1蚊搭巴士入城,搵佢講既地方。然後搵間士多買罐可樂,比唱番黎既假50蚊佢,找番47蚊真人仔,袋好準備最後用。

等到日落你就開始擺地攤,乜都唔洗,只要擺一塊黃布企係隔黎人地就知咩事。大陸憤青最憎架仔,暴發戶又媚外,你d架妹同鬼妹碟勁好賣。d碟唔係跟身,搵條後巷收好,有人黎就帶佢去收貨,一隻賣佢100蚊,一路賣一收收錢之餘一路將你d假人仔唱番晒出去。

賣完50隻,你應該已經賺到5000蚊,連埋你本身果47蚊+4蚊,已有5052蚊,你既利潤100%,冇野好搵得過咁。如是這你重複50,你既複利率收益已過億,可以買張武漢高鐵飛坐去溫州,用現金收購就黎執既廠,再請人造名牌手袋當真賣,不出3個月可翻10倍,到時應該有正牌注意到你,同你打官司,你就比5000萬個官庭外和解,跟住執左間廠,渣住9500萬番黎香港準備買殼股上市。

上市後洗人去蒙古做假新聞,話你間野挖到地下有稀土,即時炒起隻股,3日內再賺10倍,然後配股比基金佬配到自己既股份唔夠5%,你就正式引退,求其捐1000萬比仁濟醫院拎個名人身份黎做,再洗100萬登7張報紙支持政改同起高鐵,等特區政府頒大紫荊比你。

最後一步,就係等,等咩野?等天災。你最後需要既係一個機會,一有大型天災係內地發生,你捐會副身家上去,然後係街執垃圾比香港傳媒影到,舉世讚美你,1年內就做人大。

做人大後你有得選舉共產黨既常委,選自己,呢個時候唔好忘記你當初留低既47蚊+4蚊,去搵萬里,佢係中共前朝唯一未死既大佬,你拎呢52蚊出黎話係你全副身家,佢會深受感動,重拾共產黨當年起義既激情,結果拉人隊幫拖投你,以佢既影響你你足到被委任為黨主席,去到呢步,唔洗再講啦...

衍生創作

本潮文原文即高登講故台小說《一篇潮文改變一生》所指的潮文。[3]

續篇

事隔三年,2013年有人發帖詢問「被委任為黨主席」後的下一步為何,於是衍生出「將軍澳小呂布」(高登會員編號:346678)所寫的續篇。[4]

講真,黨主席話大唔大話少唔少,我建議你去歐洲打德國又好去北美洲打美國都好,中國已經冇咩發展空間喇。你先去搵北韓傾傾先,北韓等開戰好耐,金正恩多謝你都來唔切,再去日本搵安倍晉三,同佢講大陸準備去打美國,個國字都未講出口佢應該即刻打電話叫軍隊準備對付日本d美國駐軍,佢都忍左佢地好耐,之後唔洗搵其他人,理由下面再講。

係你搵完北韓同日本之後,基本上其他國家都會有代理人搵你,睇下金正恩蛇頭鼠眼,講左個計劃比佢知佢就一定幫你唱通街,想打美國既人話多唔多話少唔少,只要唔係美國人,你同佢講要打柒美國。基本上佢會問番你時間,地點,人物。

就係咁,大勢已成,你鐘意擇個良辰吉日又好,即刻打又好,你咁多人,唔洗半日,奧巴馬即刻舉白旗投降。

等到美國投降,你唔好要左美國,乜都唔要,送左比北韓先。一來北韓本身已經神憎鬼厭,二來匹夫無罪,懷璧其罪,唔洗你挑撥。轉下眼北韓就會比人做低,如此類推,打下打下就會得番你一家獨大,統一全球就指日可待。

唔夠一年,你應該已經做到全球主席,閒日你鐘意搵c朗同你篤波又好,搵美斯打藍球又好,你鐘意想點就點,當然,如果你仲係覺得唔夠,你可以整番個新宗教,自立為神。

上左神枱後洗人去周圍做假新聞,話你係神中之神又好,話耶穌係你手下又得,日日叫人上香比你,然後不停吸收晒d信眾既信念。

最後一步,就係等,等咩野?等儲夠信念,你唔係真神都變到可以立地成佛。

徐庶版

2014年高登討論區會員「徐庶」(高登會員編號:416529)詢問如何救他母親時,改篇原版並衍生出「六花_bb」(高登會員編號:366174)所寫的版本。[5]

講真,母親比曹操捉重唔重要自己諗,我建議你投曹,劉備已經冇咩發展空間喇。你先去坐橋入城,就廿兩,再去買五兩饅頭,同佢講大量買打個折,應該買到10個以上,要買攤凍同有塵的,唔好買其他,理由有機會再講。

坐到上許昌你手上仲有二百兩銀,再去買饅頭,然後係橋伕旁邊睇下邊個蛇頭鼠眼,打個眼色比佢佢就知你係徐庶,同佢講要我要行剌曹操。講完拎饅頭出黎問佢食唔食,佢見你幫襯佢就有計傾,你打蛇隨棍上問下邊個卧虎藏龍。

將淨低果一百九十五兩打散,用一百兩買通守城門條友,搵佢講要見賈詡。然後入城搵間怡紅,買通賈詡行剌曹操,淨返廿兩入宮用。

等到日落你就開工,乜都唔洗做,只要擺一塊黃布企係隔黎人地就知咩事。黃巾餘黨最憎滅黃巾兵d人,同佢地講黃巾復興係好時機,你到時成班餘黨會捧你上神枱。黃巾餘黨唔好跟身,扮冇發生過,都係for成才用,賈詡黎就叫佢帶埋餘黨去刺殺曹操,你就用剩餘廿兩早過佢地入宮知會曹操潛水,以賈詡英明領導下滅許褚唔係難事,而且佢最後都會比曹軍包圍收皮,你一路做漁翁之餘一路將比曹操捧上位。

之後做地方官,你應該已經賺到曹操信任,連荀彧郭嘉都冇得比,計埋計埋做曹操左右手唔係難事,但荀彧一定估係你自編自導自演。所以我叫你做地方官,你既隱患減少,又可以得到曹操信任,用俸祿請蔡瑁做左右手,叫佢打劉表,不出3個月劉備會出兵,到時應該詐降,蔡瑁指揮水軍都似樣,你就比兩個城池劉表,跟住陪蔡瑁坐一陣監,曹操就會因見你仲有用就大軍滅劉表救你同蔡瑁出黎。

救後曹操俾你坐擁荊襄,你就派人搵卧虎藏龍之士,3日後馬橫,即司馬懿會見,然後叫蔡瑁準備水軍,你就正式引退,叫司馬懿做自己個位,再洗全部一半身家叫陳琳登告示支持司馬同曹操打孫家水軍,等司馬見唔對路就黎你,然後同佢解釋係滅曹之計一統江山第二步,佢見唔對路即刻潛返水,留低蔡瑁等死。

之後就係等,等咩野?等打水戰。你最後需要既係一個機會,一有大型水戰係赤壁發生,你捐埋另一半身家去幫孫家,然後係江夏執垃圾比孫家睇到,舉世讚美你,1年內就做謀士。

做謀士後你可以幫孫家,呢個時候唔好忘記你當初留低既廿兩,去搵諸葛瑾,佢係諸葛亮大佬,你拎呢廿兩出黎話係你就係靠呢廿兩成才,佢會深受感動,重拾當年同諸葛亮發跡嘅歲月,但佢會因重國多於重弟,結果拉人隊幫拖投你,以佢既影響力你足以推到你被委任為都督,去到呢步,唔洗再講啦...


講真,都督話大唔大話少唔少,但我建議你去合肥打張遼又好去荊襄打關羽都好,孫家已經冇咩發展空間喇。你先去搵司馬懿傾傾先,司馬懿等回禮好耐,佢見你料事如神,多謝你都來唔切,仲投靠你,再去孫吳搵呂蒙,同佢講曹軍準備去打孫吳,個曹字都未講出口佢應該即刻飛鴿叫軍隊準備對付孫權出兵d曹操,佢都忍左佢地好耐,之後唔洗搵其他人,理由下面再講。

係你搵完司馬懿同呂蒙之後,基本上孔明會搵人暗殺你,全因佢個三分天下之計比你玩謝,睇下孔明蛇頭鼠眼,講左個滅曹計劃比佢知佢就一定幫你唱通街,想打曹既人話多唔多話少唔少,只要唔係曹操既人,你同佢講要打柒曹操。基本上佢會問番你時間,地點,人物。

就係咁,大勢已成,你鐘意擇個良辰吉日又好,即刻打又好,你雖然得司馬懿,但唔洗半年,文官如荀彧程昱,武官如夏侯惇夏侯淵會投靠你,曹操即刻舉白旗投降。

等到曹操投降,你唔好要左曹操個半壁江山,乜都唔要,送左比孫劉先。一來孫劉兩家本身已經唔妥對方,二來匹夫無罪,懷璧其罪,唔洗你挑撥。轉下眼孫劉兩家就會互屌,如此類推,打下打下就會得番你同司馬懿,統一天下就指日可待。

唔夠一年,你應該已經做到統一天下,閒日你鐘意搵司馬雲信同你踢蹴鞠又好,搵大小喬3P又好,你鐘意想點就點,當然,如果你仲係覺得唔夠,你可以做低司馬懿一家呢個心腹大患,自立為神。

上左神枱後再洗陳琳人去周圍做假公文,話你係神中之神又好,話耶穌係你手下又得,日日叫人上香比你,然後不停吸收晒d信眾既信念。

最後一步,就係等,等咩野?等儲夠信念,你唔係真神都變到可以立地成佛。

註解

相關條目

外部連結

除非特別說明,社區內容使用CC-BY-SA 授權許可。