網民聲稱與未成年少女性交事件

網民聲稱與未成年少女性交事件
日期	2011年12月29日
地點	高登討論區
起因	who_am_I聲稱曾與未成年少女性交
結果	who_am_I發文道歉
參與者	who_am_I、高登會員

網民聲稱與未成年少女性交事件，2011年12月29日一宗關於一名14歲男童「衰十一」的新聞被轉載到高登討論區，會員 who_am_I (高登ID : 307445 ) 隨即留言「成日架啦，我同個十三歲扑緊」。此言一出，引起其他會員的注意及聲稱要報警待警方處理。

事件發展

高登會員指責who_am_I的行為不當，但who_am_I仍在挑釁他們及為自己的言論進行掩飾和辨護。經過一輪的推帖後，who_am_I終於知錯及開始向會員道歉。不過who_am_I曾經發表的過分言論仍未足以令高登會員原諒他。

道歉文

who_am_I發表道歉文，希望高登會員原諒他。

道歉文內容

各位好。 我今日見到一個post，係關於一個十四歲少年既風化案。 果時我好悶，朋友全部offline，所以無無聊聊咁打左一段文字「成日架啦，我同個十三歲扑緊」。 我自己當然知自己打緊乜啦，我係想等人諗歪小小覺得「扑=性交」。 果時我已經一早諗好之後既補救方法，就係等有人話不安之後話我系剛果「同個十三歲扑緊」，想引人笑下咁，點知原來跨境犯案都係有罪。仲有人話要報警，我果時再補充，我扑緊既係地鼠game，我諗住無事，仲不知天高地厚咁叫巴打去死。果時場面失哂控，我既補充冇人理。有人提我講錯少少野去引導人去諗多都算犯罪。我即時諗到「時代廣放炸彈」案件，我心知不妙，我開新post澄清。我果時都未知我做緊乜。 到我連續比幾位網友話要報警，話我小學雞，我先至知原來我做錯左，我唔應該亂講野，上高登自係對住一班陌生既網友，而唔係你個朋友。對住自己既朋友，你講幾大個笑話都得，你自稱黑社會都得，你叫人死都得，最多得啖笑。 但係高登，我心智未成熟就係度吹水扮大個，我以為自己平時講乜係呢度都講得，上網講野唔洗負責，原來唔係咁。 我自細就係一個鐘意得罪人既小學雞，有人投訴我講野唔經大腦，我都知，可能要等我真係見慣世面先能夠解決呢個問題。 我果時對住咁多網友，明知我做錯野誤導緊人，我仲可以咁串，目中無人咁，引人側目。 經過呢件事之後，我可以話失去左好多野，可以話學到好多野。我失去左自己天真既性情，但係經過呢件事，我知到對人講野係要負責。 果時我留係果post度解釋，係因為我真係驚我失去自己既學業，驚自己失去人地對我既信任，驚遲d自己無前途，驚自己令學校蒙羞。 唔好意思我重申，我絕對冇同任何人進行過性行為，更加冇同任何女性或男性拍過拖，冇試過召妓。你地可以用五個字去形容我 – 毒男小學雞。 我真係不知天高地厚，竟然夠膽講出咁既話，仲要叫某些高登網友去死。各位可以放心，只係講笑，如果你地唔接受呢個解釋既話，我冇辨法，我心感愧疚，只可以深深地向受影響既網友講聲對唔住。真係好抱歉我既說話會令你地不安，生命受到威脅。 當晚，我好驚，訓唔著，一方面好後悔自己既講話，行為，一方面覺得呢個世界好虛偽。我果時真係唔知我係邊個。 之前我叫某位網友去死，只係覺得現實生活中講得既野，以為同網上既陌生人講都得。我自已年齡好輕，竟敢得罪，威脅殘害比我年長既網友，我心感愧疚，我只係貪玩，冇諗到我會惹來咁多網友側目。 同樣地，我話「同個十三歲扑緊」只係想引人注意，果時真係好悶，引下人笑，原來我講野冇經大腦，好似陳奕迅首<<浮誇>>「你當我是浮誇吧，誇張只因我很怕……」咁諗野唔經大腦只為引人注意，我而家諗起都覺得自己果時好唔應該。

高登唔同其他forum，我冇上過discuss,uwant,貓貓果類討論區。我一開始就睇中高登呢個平台，覺得高登既post好有建設性，硬膠文化都好好笑。我由初中起系高登做cd-rom，過幾年先註冊成為會員。高登比我既感覺係各巴打都睇通睇透呢個世界，所以都會好包容。 回正題，果晚我真係訓唔著。第二朝我發現個post回應急速上升，仲要爆埋post，我心知不妙，我真係驚自己前功盡費，即時去警局「自首」。最後差路同我傾左幾野就叫我返屋企等消息，我果時真係驚到標眼淚。 我學業一般，以前做系學校做過傻事，畀學校記左個Black Mark，果時開始，我既行為已經檢點左好多。但係把口一樣咁臭。 我平時講類似咁既野都係只會引到人笑，我用小學雞既思想以為上forum講都唔會有事，點知唔係。 我返到屋企之後，如實同家母講返，當然係被拳打腳踢一餐。當時，我已經崩潰。 已經1001爆post，而家各位網友仲話要推上報，我真係驚到就快要跳樓。但我覺得唔係方法，我一定要寫悔過書。 我回應左咁多人既留言都未表達到我既悔意，可能係，打幾隻字咁冇誠意，我真係唔想咁快就體現到社會既殘酷。 希望各位網友能夠原諒我心智未成屬而犯下既大錯，我未夠18歲竟然敢用條命挑戰法律，真係荒謬。母親大人而家火到 咁點解佢會有個咁既仔。 我以後講野一定會經大腦，講野之前一定會諗，正所謂禍從口出，咁樣我就惹來咁大既後果。 我知道學校都好包容我，我講錯野只會提下，罰下留堂咁，原來學校已經比左好多機會我。家人更甚，我講d唔應該既野只會提我，指導我。 我知道各位都好包容我，我如果唔係咁串都唔會有咁多人報警。果時我既語氣嚴重挑釁各位網友，所以令大家唔比任何人情，直接報警推上報，我都好明白，我對自己挑釁既用字好內疚。 係我比人推上報/警察上門之前，我向所有受影響既網友、家人、師長、學校道歉。希望你地可以放過一個而家心智未成熟，但係將來有一日會成熟既小學雞。唉，讀左中學咁耐，竟然仲係咁傻，仲要扮勁，我真係冇面見人。 我撞過好多次板。但係有時做錯唔認，我今次一開始仲覺得係小事，原來事實唔係咁，我終於知道原來我犯左大錯，衰11/13 / 殺人係好嚴重既罪生，做得出你一世都要坐監。(雖然我絕對唔會，冇諗住，更未試過咁做) 經過呢次之後，我真係好後悔。後悔過往做過、講過、得罪過既人/事，我已姐,5有所得著同反省。 原來呢個社會就係咁，仲可能會比咁樣更嚴重，以後講錯小小野可能會被解僱，甚至惹起官司，入獄。講錯野既後果可以無限大。我仲未完全長大，可能只係上左一堂課。但我以後一定唔會再好似今次咁。請大家相信我，我以後唔會再犯，唔會再挑戰法律，唔會再做錯唔認，死雞撐飯蓋，挑釁大家。 我文筆唔係咁好，以我能力寫千零字已經好難。我唔係好識作文，所以我用廣東話打呢篇悔過書，希望大家唔好介意。 請大家比一次機會我重新做人，比一次教訓我，我相信多數高登仔內心係善良既。 再一次向受影響既人、家人、學校、老師道歉。 Who_am_I

相關條目

• 網民聲稱炸毀時代廣場及特首辦事件

外部連結

• 高登討論區:[毒撚喜訊]14歲男童疑與女童性交被捕
• 高登討論區:對「同十三歲扑緊」一事既澄清
• 高登討論區:[推到上報]who_am_I 對「同十三歲扑緊」一事既澄清