http://www.espnstar.com.cn/NewsImages/PicNews29a1182.gif
黃興桂經常以「八股」語調，時而「九唔搭八」地講波，使球迷捧腹大笑。
網際網路更流傳「黃興桂足球語錄」。
在東方日報貼波經常「開對家」，被球迷冠以「燈神」（如明燈指引球迷投注）的稱號。
有球迷在網站「開壇供奉」為他作統計，甚至有人將主禱文改寫成稱頌「燈神」的內容。（詳見燈神主禱文。）
他曾為香港甲組球隊南華的領隊，惟球隊在他的帶領下降班，最後由足總作出挽留。
命中率統計
黃興桂經常在他的專欄中發表自己對於球賽的看法，由於他的看法與球賽往往事與願違，因而被人轉貼以及奉為「祝福」，「福音」或者「聖旨」。 以下為部分專欄以及結果 Ｐ．Ｓ：由於大部分資料已經失傳，於是統計資料由本次歐國盃開始計算。
| 下注日期 | 賭博項目 | 標題 | 預測 | 實際 | 對家率 |
|---|---|---|---|---|---|
| 16/06/2008 | 奧地利 對 德國 | 德軍要省靚番個招牌 | 讓球客勝 | 德軍勝 | +0 |
| 17/06/2008 | 荷蘭對羅馬尼亞 | 為冠軍鋪路順勢除意法 荷蘭明醒羅馬尼亞 | 羅馬尼亞勝，除意法 | 荷蘭勝，意大利出線 | +1 |
| 18/06/2008 | 瑞典對俄羅斯 | 伊巴拿臣贏卡士 瑞典硬淨平手盤抵玩 | 平手盤瑞典勝 | 俄羅斯勝 | +1 |
| 19/06/2008 | 葡萄牙對德國 | 葡萄牙以逸待勞 | 主勝 | 客勝 | +1 |
| 20/06/2008 | 克羅地亞對土耳其 | 克羅地亞贏波唔出其 | 克羅地亞勝，土耳其輸很正常 | 和局，12碼土耳其贏3:1 | +1
|
08-09賭博統計
| 下注日期 | 賭博項目 | 標題 | 預測 | 實際 | 不中率 |
|---|---|---|---|---|---|
| 16/08/2008 | 新特蘭對利物浦，布力般對愛華頓 | 普雷斯頓主場堅直取Ｗ | 利物浦勝，愛華頓勝 | 愛華頓負 | +1 |
| 17/08/2008 | 曼聯對紐卡素，車路士對樸茨茅夫，阿士東維拉對曼城 | 曼車和波２串３ | 和，阿士東維拉勝 | 曼聯1:1紐卡素，維拉4:2曼城 | 0 |
| 23/08/2008 | 利物浦對米杜士堡 | 紅軍細好分過W | 紅軍細 | 利物浦2:1米杜士堡大 | +1 |
| 24/08/2008 | 曼城對韋斯咸，國際米蘭對羅馬 | 奧運帶來無盡回憶 | 韋斯咸勝，國米勝 | 曼城3:0韋斯咸 ，國米90分鐘內未能取勝 | +1 |
| 30/08/2008 | 愛華頓對樸茨茅夫，阿仙奴對紐卡素 | 樸茅紐卡素和波2串3 | 樸茨茅夫，紐卡素和 | ||
| 31/08/2008 | 阿士東維拉對利物浦，皇家馬德里對拉科魯尼亞 | 阿士東維拉，拉科魯尼亞勝 | |||
| 06/09/2008 | 卡塔爾對烏茲別克，巴林對日本 | 卡塔爾有水有力 | 卡塔爾，巴林勝 | ||
| 13/09/2008 | 利物浦對曼聯，曼城對車路士，布力般流浪對阿仙奴，樸茨茅夫對米杜士堡 | 歐聯前夕雙紅會免傷和氣 | 利物浦，曼城，布力般和 | 全部皆不和 | +1 |
| 14/09/2008 | 史篤城對愛華頓，華倫西亞對艾美利亞 | 愛華頓有苦自己知 | 史篤城下盤 | ||
| 20/09/2008 | 伯明翰對黑池，普雷斯頓對狼隊 | 伯明翰超班咪拗頸 | 伯明翰，普雷斯頓勝 | 伯明翰負 | +1 |
| 27/09/2008 | 曼聯對保頓，史篤城對車路士，阿仙奴對侯城 | Big3波膽過關好滋味 | 曼聯、阿仙奴、車路士勝 |
黃興桂的背後
「原來黃興桂係三狼案死者黃應求之長子」 做個快活人黃興桂：足球是財源是樂園
其父黃應求在50年代已經贊助傑志、中華足球，那是姚卓然、莫振華的黃金歲月，其家族是球圈的活躍分子。在美國唸書的黃興桂，每到假期便拖著爸爸看球，自幼與體育圈相熟。 後來父親橫死，黃興桂長大後希望進入足球圈，在黃文偉、故友簡而清等的幫忙下償了心願，「我對他們永遠都心懷感激。」
78 至90年間，黃興桂先後出任東方、南華、荃灣的教練，90年忽然懷念北美的悠閒生活，加上九七因素，便移民美國，在貿易公司謀了一職，兩年後興之所至，做中間人開辦美國世界杯睇波團；95年受聘ESPN，做其全職評述員，憑著講波時源源不絕的「金句」，另類風格，輕易成為球迷的話題。記者都拋句孔子金句，形容球迷心情：「愛之欲其生、惡之欲其死」。
黃興桂足球語錄
「我每句話都是隨心隨意，由於我受美式教育，中文麻麻，思考都是用英文的，有時把句子直譯中文就會出現好笑效果。世界著名評述員馬田泰拿便有很多佳句，又有很多運動員本身具大學程度，評述時都有精警句子，我聽多了，不自覺便會運用。還有一些句子，是童年時聽爺爺說過，我很記得這些字眼，講波時又會自動冒出來。」 原來是童年回憶，難怪他別有滋味。
「用蔗渣價錢，踢出燒鵝味道。」黃興桂解釋，做廠的爺爺說窮人用蔗渣來做鞋子，令賤價形象入了腦，「燒鵝是我自己加的，細個時覺得燒鵝好好味！」
「呢位球員打法好經濟。」黃興桂說，外國人會用經濟（economy）形容踢得「輕輕力」，求求其其。
[我都知球迷對我的看法很極端，喜歡的會記得我教東方時拿了好多獎杯，討厭的，就罵我教到南華降班。」黃興桂一點也不動氣，「我熱愛足球，因為它是快樂來源和財源！我講波是想分享作為球員、教練的睇法，我很享受這份工作。」
黃興桂金句
- 領先一“粒”
- 波係圓，係用來踢既
- o係今場波邊隊能夠入一“粒”先，果隊就會有優勢
- 睇波呢家野，睇得波多咪睇到多d好波囉
- 防守“生”波
- 罰波
- 好急勁既罰波
- 呢個罰波係o係右路偏左既位置
- C朗成日插水
- 每隊波都要有個好既死球專家 <-----經典...
- 每隊波都要入“燕梳”既第二球
- 所以話，現代既足球每隊波一定要有一個罰波專家
- 現代既足球，係將皮球送入網窩裡面既
- 現代足球講求有實力，有速度
- 現代足球最緊要攻守兼備
- 呢球波拉得咁行唔係用腳背，係用腳既肉心呀
- 射波最緊要射中個龍門
- “浪射”
- 當一隊波進攻既時候，另一隊就需要去防守
- 十二碼呢家野呢，有兩個可能性，一係入，一係唔入
- 呢球波一係入，一係龍門救到，一係出界
- 呢球波，如果冇龍門就入喇
- 呢球波射得恰到好處，唔太高，唔太矮，唔太勁又唔太遠，總之就入啦
- 一個好既守門員可以令到場波由輸變和，由和變嬴
- 哈哈，龍門最好既朋友係邊個呀？咪係龍門柱囉
- 呢球波 keeper 有反應
- xx龍門又再一次勇救險球
- 呢個龍門眼有神
- 幾時都話，後防好緊要，紐卡素就差係呢度〔利記對紐卡素重覆了大約十次〕
- 防守球員犯左腦筋上既錯誤
- 拿…做防守球員最緊要係咩呀？咪“安全第一囉”
- 條防線包得無深度， 裝越位失敗，咁咪失波咯
- 個防守球員回波比龍門回得唔好， 不過唔緊要，佢地好friend架，唔會鬧佢架
- 做前鋒最緊要有力
- 識轉身既前鋒好值錢
- 後生、有身材、有活力 (唔係講緊女丫)
- 當打、有態、有身材 (都唔係講緊女丫)
- 呢位球員打法好經濟
- 呢隊波好有性格
- 睇下隊波肯唔肯打d藍領足球
- 場波已經擺左落雪櫃
- o拿，傑仔！呢 D 咪就係好波囉
- 波唔使講架，球迷自己識睇
- 呢場比賽我只可以用“一個字”黎形容---精采
- 嘩！睇呢場波就興奮過食興奮劑
- 球迷們有福喇
- 球迷們，足球就是這樣的
- 好波不妨一睇再睇<---正!!
- 本死無大害
- 在傷口上加鹽
- 有時呢 D 野真係時也命也喇
- 陰溝裏反船 -> 陰鳩裏反船
- 西班牙球會奧沙辛拿(Osasuna)=「奧沙桑拿」
- 新特“撚”
- D 利物浦球迷唱緊佢地既會歌——你永遠唔會一個人行路
- 呢場波利物浦唔理嬴幾多球，總之一定要嬴
- 呢球波係咪真係紅軍既利物浦出界架？好似擦到藍軍球員既波襪架喎
- 愛華頓呢隊波蔗渣o既價錢，但係踢出燒鵝o既味道
- 巴路士，淨係識得一味去，冇諗過交俾身邊既隊友
- 利物浦的巴路士同列斯的巴基.....兩個都係姓巴........（英文名呀大佬）
- 伯明翰同埋保頓，兩隊波都係“Ｂ”字頭
- 保方保方，保住後方
- 保定保定，保住就定
- 梅度梅度，梅開二度，跟住加多句“林伯特差Ｄ入多球，變埋梅度”
- 近排加利仔狀態唔夠fit呀–第一佢跑得慢！第二佢唔夠快！！第三無速度！！！
- 呢球波史高斯好有機會入波，但係無機會起腳
- 希斯基，力的表現!!!
- “O”雲仔
- 呢球波“O”雲仔好巧妙咁編(騙)過對手
- “O”雲仔一心自己去，一定架啦......英倫三島的前鋒係唔會交波架......
- 呢球波碧咸傳得好靚架，不過前面羅唔到咋嘛
- 亨利：12碼都唔入，30碼又點會入呀
- 柏金呢隻老馬就好似星期三晚夜馬隻駿先鋒咁，追極都追唔到呀！
- 托度咁好波，D前鋒邊夠膽射佢呀
- 你睇下簡尼, 呢個角球, 由頭到尾都望實個波, 幾專注, 所以係一級門將
- 我鍾意泰利,因為佢頭鎚好,制空力強,跳得高
- 哈素賓基個名咁長， 個 Shoulder 冇返咁橫都印唔晒個名
- (舒利亞控球失誤)唉,舒利亞老喇 (舒利亞入球後)舒利亞不愧為一個一級射手,拖住疲乏既身軀,仍然能射入一球
- 沙華治係中場殺手， 唔係情場殺手
- 睇下巴布爾幾大力呀，條頸幾粗呀
- 佢既全名係冼拿馬‧邦高利，如果是旦叫冼拿馬或者邦高利就係唔岩既，你有無人叫歐陽做阿歐架？歐陽就歐陽，司徒就司徒架嘛，佢就係咁樣樣喇，冼拿馬邦高利, 冼拿馬‧邦高利，如果我今晚叫到你全名6次，我就請你食宵夜
- Free.......dle (注︰要拉長尾音)
- 呢場波可能係英倫三島兩個最佳左後衛既對決 --- (阿仙奴 vs 列斯--艾殊利高爾 vs 夏迪)
- 做唔成英雄，就做罪魁
- 打波既野有時要睇「 食送」食飯。
- 單蹄馬
- 球証巴巴先生
- 唔會俾牌， 英倫三島既球證唔會咁易俾牌.......真係比喎.....球證太過嚴
- 藍色衫打得好過紅色衫
- 今日藍色波襪踢得好過白色波襪
- 利物浦對 車仔：球場上一係藍衫，一係紅衫
- xx 球員， 今日生日啦.
- 呢d波仲唔生日
- （列斯領先2:1）領先緊一球就梗係同你死守,守住個勝果（紐卡素扳平2:2之後）拿,呢個就係打死守既後果）
- 阿仙奴開波幾分鐘就入波，好打好多。
（被追和後）我都話，太早入波未必好架......因為有大把時間比人追丫嘛 - 無論o係邊個時刻邊個時辰，英超既每一隊波都會有表現既
- 領隊谷隊谷得好“應”！
- ESPN–“超級星期天”變“和和星期天”
- 呢D老鬼，食鹽多過你食米
- 入到禁區就係皇帝
- 又快又怪，又帶個波出界
- 大家都係巴西腳， 所以知你想點去架啦
- 奧尼爾開心到跳起， 跳得高過NBA果個奧尼爾
- 睇佐敦，有今生， 冇來世
- Let's go, rock and roll! 短片
- 哎o也！倒卦鳩勾！ 短片
- 有今生冇來世呀喇...呢球波...嘩...神奇、頂級、超卓 ! (謝拉特在補時階段40幾碼拉弓離地抽射入網，) 短片
- 百步穿陽即係跑左一百步之後射入咁解
- 呢班人擊鼓...唔係鳴怨ma (佢自己都笑埋...果度係有班人半場休息時間係度打鼓表演姐)
- 我覺得利物浦仲有2個機會去追平, 就係"渺小"同埋"冇"
- 可罰佢就唔罰（06/07 歐聯四強次回合利記vs車仔）[1]
- 麥包「夾」火腿呀吓，le個呢係．．．兩個．．．藍色「夾」一個．．．嘩！呢塊火腿好大塊喎．．．嗱係好似整塊麥包火腿凸咗d火腿出嚟咁嘅樣（06/07 歐聯四強次回合利記vs車仔）[2]
- 兩個人都唔夠佢高...（06/07 歐聯四強次回合利記vs車仔）[3]
- 機會只得兩個——渺茫,同埋無
- 碧咸係一個得隻右腳o既球員
- 朴智星今晚食左兩支高麗蔘呀？咁好氣力既！
- 記住係食高麗蔘，唔係花旗蔘呀！花旗蔘虛架！
- 杜奧巴好勁,真係畀架巴士撞都未必死！
- 準決賽梗係重要過決賽啦，因為贏唔到準決賽又邊有得打決賽呢！（好多年前的歐聯四強賽）
- 好心啦，射死球中o下籠一次俾我地睇o下，精彩d好唔好呀?
- 兩號球員
- 又射左去天后廟
- 呢個敗家仔，咁樣炒高
- 呢位只係可以講話係死球處理者，唔係死球專家，因為佢未試過中籠
- 波歷克兵臨城下，迎頂破網
- 你睇佢唔似咁高，但係其實就係好高
- 迪亞比...而家先23歲咋，陰功，效力左阿仙奴成3年啦
(08歐聯決賽)
- 馬基里尼係中場既警察
- 球波唔夠頭先我食果條蕉咁彎
- 場邊幾個穿曼聯球衣既球迷,桂神話: "o拿, 呢d係曼聯球迷!"跟住畫面影幾個穿車路士球衣既球迷,江忠德話: "咁呢d係車路士球迷!"桂神即刻寸佢, "梗係車仔球迷啦...唔通係間諜咩?
- 車路士班主艾巴謙莫域
- 個個係咪油王個新歡?好似叫咩娃wo 江忠德:你send個e-mail問下佢lo
- 著牛仔褲當兵
- 個波係唔會講大話嘅,ball don't lie!
- 我覺得上半場和過和味龍
(08奧運)
- 踢跌欄,無運行
- 呢個係"路絲瑪莉韋達"(高八度聲線),唔係騎師韋達個女呀
- 阿根廷已經領先兩"lup"
- 觀眾知唔知第二第三係邊個? 老實講 , 我唔知. 麻煩觀眾email比我地知!
- 邊個第二第三全世界唔知,我都唔知,睇埋慢鏡咪知羅
- 9號風球~係屋企睇排球,唔洗2頭遊!
壹週刊訪問
2006年5月
非常人語
人生十二碼 黃興桂
南華降班，是球會歷史上第二次，風平浪靜。
幸福總是來得太遲，一九八二年首度降班，球迷騷動、燒垃圾桶、幾乎拿當時教練黃興桂凌遲處死。
責任，他承擔；榮辱，看得很淡，畢竟，超乎人類極限的痛苦，他嚐得多。
一般人的經歷：中年喪父，老來喪偶。他的個案：年幼，富商父親黃應求被三名匪徒綁架撕票，乃哄動一時的「三狼奇案」；中年，妻子遇空難逝世；到得老來，癌症帶走他的幼弟……老天一直要他為死亡作見證。
寓言《狼來了》當中，牧童吹雞報流料，惡作劇釀成大禍；但若狼早到，一開始便打真軍，後果如何？
「最壞的事，已在五九年發生了（三狼），冇咗個爸爸；至今任何嘢，我都頂得住。」
大半生用痛苦彩排豁達，今年六十歲了，擔任體育評述員，講波等於遊戲等於講波，即使人生不易玩，也能遊戲人間。
新版《狼來了》，這個老頑童先苦後甜喜劇收場。
遊戲人間第一守則：孖煙囪。這天，他主動帶了三件衫來，方便我們拍照；褲，只有一條孖煙囪。
記者首次面對着孖煙囪的被訪者，有點手足無措。
接受《壹週刊》訪問，雖稱不上什麼大事，但也不是落樓下大牌檔食叉油雞瀨，「有次我著孖煙囪上機，唔俾搭頭等，但機票買咗，蝕底改搭商務。」
另一次會見新加坡保安司，夠膽死又著孖煙囪，難得對方不介意。今次見區區記者，更理所當然。
遊 戲 人 間 第 二 守 則 ： 隨 口 。 十 一 年 來 在 ESPN 講 波 （ ESPN 總 部 在 新 加 坡 ， 天 氣 熱 ，故 此 他 習 慣 著 短 褲 ） ， 為 人 熟 識 的 不 是 南 華 降 班 ， 不 是 三 狼 奇 案 ， 而 是 經 典 金 句 ：「 呢 場 波 贏 輸 唔 緊 要 ， 最 緊 要 唔 好 輸 ！
「十二碼有兩個可能性，一係入，一係唔入。
「睇佐敦打波，有今生冇來世。
「利物浦球迷唱緊佢哋嘅會歌：你永遠唔會一個人行路（《You will never walk alone》）。
「加利仔有三個缺點：冇速度、跑得慢、唔夠快呀！
「碧咸係得一隻右腳嘅球員。」
50%無心之失，50%苦心孤詣經營幽默，只惹來球迷放上網嘲笑，名為「黃興桂101金句」，用電郵發放頌揚，記者身邊的人都收過，因此即使不看足球的，都認識他；近來看有線，評述員仍引用某些金句作笑柄；甚至「維基百科」網站也介紹他，評語是「九唔搭八」。 你有你恥笑，他金句不絕。究竟誰是傻仔？說笑的，還是聽到傻仔說笑時會笑的？
「我講波鍾意自然流露，即興。 「網迷、球迷是否捧我場，for good or for bad, I dont care. Its not going to make me食少碗飯，or瞓少一個鐘頭覺。」
此刻，你可能認為黃興桂又九唔搭八，幾乎又創出金句。其實他曾在美國唸大學，習慣雙語廣播，「碧咸係得一隻右腳嘅球員」便是由英譯中期間出事，原意：碧咸只懂用右腳踢波。
狼來了
「十二碼有兩個可能性，一係入，一係唔入」又從何說起？
父親黃應求經營燃料出入口及地產生意，一九五九年六月十九日，被三名戴上野狼面具的綁匪擄走。三日後，黃家收到從澳門寄來的勒索信，內附黃應求隨身物品，以及一隻人耳。阿爺不告訴家人勒索金額多少。
黃興桂是長子，當時十四歲，在聖約瑟唸中三，「當時讀死書，好辛苦。到六月尾臨近放暑假，梗開心啦，準備日日踢波，點知阿爸出事。
「 足 球 都 係 ： 球 證 判 十 二 碼 俾 你 ， 咪 開 心 住 呀 ， 唔 係 入 梗 ， 射 入 咗 先 至 慶 祝 啦 ！ 」
那天早上，黃興桂趕緊出門跟神父行山，沒跟父親道別，之後再沒機會。
名探長呂樂接辦此案，之後九個月，每日三更，每更二男一女警員駐守渣甸山黃宅，像《教父》情節禁止出入：踢波，只有在大宅後園，還好，其中一名警員是甲組球員（當時警方派隊參加聯賽），每日教黃興桂腳法。
「全家堅強面對，但絕非強裝冷靜扮冇事。阿爺（黃錫彬）六十多歲，每日上班；阿媽失去老公，我未見佢哭過，帶大我們五兄弟姊妹。」
黃應求始終沒回來。年半後，十二碼再度射失：過年前本應開開心心，阿爺竟也被三狼綁架，勒索二百萬，黃還價一百萬，並答應先付一半，終在十七日後獲釋。
六一年底，三狼內鬨，當街互揭身份被捕，才爆出真相：黃應求被綁當天逃走，從後被匪徒用鐵鏟擊中後腦慘死。其中一隻狼是黃家遠親兼前度僱員，他帶警員到淺水灣起出黃應求骸骨。
「至今四十幾年，我經常發夢，夢見等候阿爸帶我入球場睇波。」
六二年，香港最後一次執行死刑，主角是三狼。
「Life goes on。這件事教識我：逆境也要生存，有事發生了，別怨天怨地，要面對。
When the going gets tough, the toughs get going.」這是第102條金句，一般球迷未必聽過，「意思係：當際遇變得困難，只有硬漢能適應。第一個tough解作困難，第二個tough係硬漢，有s，眾數，所以之後個get唔使加s。你讀一次俾我聽……」
屍路
之後赴美入讀UCLA及從事文職工作，七三年回港。家族成員若非從商，便教書、教琴、擔任火箭工程師，十一叔黃應士則是資深電視新聞從業員，名堂響亮；唯他漸露遊戲人間個性，投身永無發達的球圈。
從沒當過職業球員，先跑到本來沒有足球隊的陳維周紀念中學，五年後教出總成績冠絕全港學界的勁旅。之後任教職業球隊東方，兩屆內兩奪杯賽冠軍。八二年，滿有自信地攀上人生頂峰、也令他幾乎被凌遲處死：執教班霸南華。
當時有人看他面相氣色：「你今年好邪！」他懶理。某天操練時，一張燒剩的衣紙不知從何處吹入球場，落在他頭頂，情節像《怪談》，下文卻比「Discovery Channel」動物廝殺更血肉模糊。
他忙於工作，結婚僅四年的妻子只好獨自遊美，乘搭的泛美客機在新奧爾良墜毀。他經三藩市到新奧爾良，「去執屍」。
「路途當然艱難，又要諗南華，又唔知屍體點。」到埗，滿眼一袋袋死屍，在場心理醫生跟他說：「你信我，我有你太太的牙齒記錄，證實係佢……你最好唔好打開呢個袋，否則會帶來一生陰影，發噩夢……」
帶棺材回港，仵工說防腐劑氣味極濃烈，建議別開棺。最終直接火化。
他從來不知道妻子如何血肉模糊。
「跟阿爸一樣，佢本來活生生、冇事，咁就離開咗我。
「至今，我仍夢見老婆，夢見當年我追她的情景：打極電話找不到她。她太靚，太難追。
「相反，我從未夢見佢兩個點死，因為我根本見唔到。」
同年，他執屍時也掛念的南華降班。
廿四年後的今天，南華又降落乙組，若他阿Q一點，會想：總算擺脫「歷來唯一教練令南華降班」的污名，真正You will never walk alone；實情：人們本已忘記的陳年舊事，又出土鞭屍，難得他仍跟我們到南華會拍照，這叫豁達。
兩年前，在三藩市定居的幼弟患上肝癌，當地醫生放棄醫治。與之前兩宗個案不同，黃興桂一直照顧他，帶他到廣州求醫、臨終前十日，一起入場觀看世界盃外圍賽中國贏香港七比○。
諷刺的是，弟弟彌留時，黃興桂因工作不在身邊。
「我教波，講波，佢最支持。自此，我哋全家更珍惜相聚時刻。今次我回港，便跟阿媽、黃應士、姑姐食飯。
「睇佐敦，有今生冇來世；家人一樣。」
資料顯示：黃應士曾在吃飯時鯁骨，需割掉十二吋腸、好友尹志強曾患鼻咽癌。訪問當天電話響起，一名友人癌病惡化，要戴氧氣罩……他身邊的人彷彿受咒詛。「唔係。可能其他人都係咁，只不過我係公眾人物，多人知。」你是黑仔？「I dont think so。喂，好嘢又點計？一出世唔使憂柴憂米、可以留學。」
十一年前獲簡而清介紹到ESPN講波至今。將來，他不敢計劃，「我經歷得太多，唔鍾意太多預謀。與其失望，不如見一日行一日。
「講波前也不預定講稿，咬字又差，所以講錯：『呢場波贏輸唔緊要，最緊要唔好輸。』」
Female
遊戲人間第三守則：美女。自認有很多女友；最短的散拖僅維持了一個月；最愛「馬拉female」；年紀最小的female細他一半……「這是我的缺點。」
記者受他感染，斗膽創作金句：「黃興桂有三個缺點：花心，唔夠專一，鹹濕呀！」「唔係鹹濕呀！唔好呀大佬！」
見面翌日，他身在新加坡，撥長途電話來補充資料，談了一個多小時。身處錄影廠嗎？「唔係，我踎緊塔！」
收線前傳來沖水聲。 踎個多鐘，這是超乎人類極限的耐力；宣示如廁，這叫豁達。
<全文完>
燈神主禱文
主禱文全文：
- 我們在《東方》的神，願人都跟您貼士為勝，
- 願您的燈降臨，願您的選擇登在報上，
- 如同登在高登一樣。
- 我們日用的金錢，求你今日賜予我們;
- 又求減免我們的債，如我們取馬會的錢一樣。
- 不叫我們遇見試探，拯救我們脫離債務。
- 因為主客和,大細,讓球,全買對家,直到永遠! 阿們
參見
(請替換這裡的粗體字)
